Euskadiko 10 film laburrak Campos Eliseos Antzokian izango dira ikusgai maiatzaren 8an, ostirala, Zinemaldiaren irekiera-galaren ondoren, 22:30ean.

Bilboko Udalak antolatzen duen FANT- Bilboko Zinemaldi Fantastikoak gaur goizean aurkeztu ditu FANT LABURREAN – EUSKAL FILMAK atalean lehiatuko diren 10 film laburrak. Film labur horiek Zinemaldiaren irekiera-galaren ondoren proiektatuko dira, maiatzaren 8an, 22:30ean, Campos Eliseos Antzokian. Gaur goizean, Azkuna Zentroko Bastida Aretoan egin den prentsaurrekoan, honako hauek izan dira: Gonzalo Olabarria, Bilboko Udaleko Kultura eta Gobernantza zinegotzia; Amaia Domingo, Zinemaldiko zuzendaria; eta Sail honetan parte hartu duten film laburren zuzendariak: Daniel Gomez Mugica (“El agujero”, 2025); David Ontoria (“Aziza y el último hombre bueno”, 2025); Danel Garay (“Azpian”, 2025); Ekaitz Bertiz (“Erreka zoko hortan”, 2025); Andoni Fernandez (“Glory Hole”, 2025); Aitor Molina (“Hariaren amaieran / Al final del hilo”, 2025); eta Igor García Piñas (“Zezena eta umea”, 2025). Hautaketa osatzen dute: Laura Barquin (“Azpian”, 2025, zuzendari-kidea), Egoitz Díaz Ibargoitia (“Última salida”, 2025); eta Oihan Gastesi eta Ander Arrieta (“Arditurri”, 2025). Gonzalo Olabarriak nahiz Amaia Domingok aurkeztutako lanen kalitatea ez ezik, Zinemaldiak tokiko sortzaileen talentuaren alde egiten duen apustua ere nabarmendu dute. Izan ere, film laburrak FANTen bereizgarrienetako bat izatera iritsi dira hasiera-hasieratik.

FANT LABURREAN – EUSKAL FILMAK SAILEKO 10 FILM LABURRAK

“EL AGUJERO” 2025 / 10 min. Zuzendaritza: Daniel Gomez Mugica. Mikel lagunekin aterako da parrandan, haietako bat agurtzeko atzerrira joan aurretik. Lagunek edan eta barre egin eta maite-jokoetan ibiltzen diren bitartean, bera lekuz kanpo sentitzen da, prozesatu ezin dituen oroitzapen eta emozioek harrapatuta. Neska-lagun ohia eta gizon ezezagun kezkagarri bat agertzeak errealitatearen eta haluzinazioaren arteko bidaia bitxi batera eramango du. Diskotekako komunean, Mikel komunera bultzatuko dute, eta amildegirantz jaisten hasiko da sinbolikoki. Itzultzean, dena aldatuta dago. Beste gau bat ematen zuena eldarnio intimo eta bizi bihurtuko da bere beldur, bakardade eta amorruarekiko.

“ARDITURRI” 2025 / 9 min. Zuzendaritza: Oihan Gastesi, Ander Arrieta. Arditurriko meategiak 1984an itxi ziren. Geroztik 19 urte igaro dira, eta espeleologo eta ikertzaile talde batzuek barrualdea aztertzeko asmoa hartu dute, zein egoeratan dauden ebaluatzeko eta berriro irekitzea posible den ikusteko. Ohiko esplorazio-misio bat zirudiena bizirauteko borroka bihurtuko da. Izan ere, han behean, sakon-sakonean, benetako izua dago.

“AZIZA Y EL ÚLTIMO HOMBRE BUENO” 2025 / 20 min. Zuzendaritza: David Ontoria. Asier eta Sergio mahai-jolas batean jolasteko elkartuko dira lonja batean. Ezagutza esoteriko zabala duen pertsona bat dago jolasaren ideiaren atzean, eta Asierrek jainko afrikar bati dei egingo dio karta bat irakurtzen duen bitartean. Esperientziak erabat markatuta geratuko da, eta egunen batean horrelako gauza hain aparta berriz ikus ahal izatea espero du.

“AZPIAN” 2025 / 5 min. Zuzendaritza: Danel Garay, Laura Barquin. Bi ahizpa kondaira ilun bat ezkutatzen duen laku batean bainatzen ari dira. Istorioak beldurrezko zinemaren formalismoak hartzen ditu, familia baten hausturari eta bi alaben egoera emozionalari buruzko kontakizun intimoa eraikitzeko.

“EL CUERPO DE CRISTO” 2025 / 12 min. Zuzendaritza: Bea Lema. Deabru bat dabil Adelaren etxearen inguruan, eta jazarri eta min egiten dio. Ondorioz, psikiatraren kontsultara joaten da, eta medikazioa izango da haren arazo guztiekiko erabateko erremedioa. Baina berak nahi duena da benetan zer gertatzen zaion kontatzea eta norbaitek hori entzutea. Errealitateak erlijioan eta erritu herrikoietan bakarrik bilatuko du lekua, eta, ondorioz, sendalari batengana joan eta dena nola eta noiz hasi zen aitortuko dio.

“ERREKA ZOKO HORTAN” 2025 / 16 min. Zuzendaritza: Ekaitz Bertiz. Joxepik, Iparragirre baserriko alaba zaharrenak, gaixorik dagoen aitaren lana egin beharko du: pakete astun bat kontrabandoan igarotzea Frantziako mugatik. Gaueko iluntasunean, ordea, mugazainak ez dira basoan ezkutatzen den gauzarik beldurgarriena.

“GLORY HOLE” 2025 / 16 min. Zuzendaritza: Andoni Fernandez. Borjak Glory Hole bat aurkituko du diskoteka bateko komunean. Zalantza egiten du, baina azkenean probatzea erabakiko du. Handik pixka batera, zakila zulotik ezin duela atera konturatuko da. Une horretan, Borjak aurre egin beharko dio bere patuari gutxien uste duen lekuan; badirudi patu hori jada idatzita dagoela.

“HARIAREN AMAIERAN / AL FINAL DEL HILO” 2025 / 6 min. Zuzendaritza: Aitor Molina. Celio mutil bakarti bat da, eta bikoteen patua lotzen duten hari gorriak ikus ditzake.

“ÚLTIMA SALIDA” 2026 / 5 min. Zuzendaritza: Egoitz Diaz Ibargoitia. Esperimentu batek eskuetatik alde egin die, eta orain kaosa da nagusi eraikinean. Clarak lehenbailehen irten behar du. Bakarrik dago, baina badaki non dagoen irteera. Azkar ibili behar du, haiek gero eta hurbilago daude-eta. Denbora agortzen ari da.

“ZEZENA ETA UMEA” 2025 / 16 min. Zuzendaritza: Igor Garcia Piñas. 60ko hamarkadan, Gartzia, Miren eta haien haurra baserri isolatu batean bizi ziren. Pobreziatik ateratzeko, Gartziak zezen kementsu bat erosiko du, baina plana okertu egingo da: animalia ezin dute kontrolatu. Tentsioak gero eta handiagoa da, eta egun batean haurtxoa desagertu egingo da. Eskura ditzakeen sariez gain (epaimahaiarena eta publikoarena FANT Sail Ofizialeko film labur onenarentzat; eta epaimahaiarena FANT Sail Ofizialeko euskal film labur onenarentzat), Euskal Aktoreen Batasunak film labur horien Interpretazio Onenaren saria emango du.

EUSKARAZKO IKUS-ENTZUNEZKOAK SORTZEKO ETA EMAKUME SORTZAILEENTZAKO LAGUNTZA

Bilboko Zinemaldi Fantastikoaren helburua da ikus-entzunezkoak sortzean bultzatzea, batez ere euskaraz egindako lanak, Bilboko Kulturaren 2023-2033 Plan Estrategikoaren ildo estrategikoekin bat etorriz. Hori dela-eta, FANTek, beste edizio batez, euskaraz fantasiazko film labur bat ekoizteko proiektuak sustatzeko deialdia bultzatu du.

Hautatutako lanek 5.000 euroko saria jaso ahal izango dute, film labur bat egiteko. Zinemaldiaren esparruan, parte-hartzaileek bere proiektuak aurkeztu eta defendatuko dituzte herritarrei irekitako saio batean eta horretarako izendatutako epaimahai espezializatu baten aurrean. Bilboko Zinemaldi Fantastikoak, halaber, emakume sortzaileek egindako lan zinematografikoak babesten ditu.

Horrela, lankidetzan aritzen da GIDOI-Euskadiko Gidoigileen Elkartearekin, eta Emakume Egileentzako Film Laburren Gidoiaren Lehiaketaren III. edizioa aurkeztu du, fantasiazko eta beldurrezko generoko gidoietan oinarritua, FANTekin bat eginez. Zinemaldiak GIDOIrekin duen lankidetzaren helburua da ikus-entzunezkoetan emakumezkoen talentuari ahotsa ematea, eta (H)emen-en laguntza ere badu. Horrela, lankidetza hori gauzatzeko, industry jardunaldia egin zen atzo, maiatzak 6, Campos Eliseos Antzokiko Kupula aretoan, “Emakume gidoilariak, aurrera egiten duen zinema” izenburupean. Saioan zehar, emakumeek sektorearen bilakaeran duten egitekoa eta sorkuntza aztertu ziren, lehendabizi elkarrizketa-mahai bat eginez eta, ondoren, pitch saio batean.

Era horretan, Emakume Egileentzako Film Laburren Gidoiaren Lehiaketaren III. edizioan hautatutako gidoilariek beren proiektuak aurkeztu zituzten sektoreko profesionalen aurrean. GIDOIk sustatutako lehiaketaren epaia FANT Bilbaoren esparruan emango da jakitera, maiatzaren 16an, 19:30ean, BBK Aretoan egingo den itxiera-galan.

SARRERAK ETA ABONOA

Inaugurazio-saiorako eta euskal film laburren saiorako sarrerak Campos Antzokian erosi ahal izango dira bakoitza 5 euroren truke, eta amaierako galarako eta palmaresaren proiekzioetarako sarrerak BBK Aretoan prezio berean.

Azkuna Zentroko Auditorioan eta Golem Alhondiga zinemetako 1. aretoan programatutako proiekzioetarako sarrerak ere salgai egongo dira 5 euroren truke.

Sarrerak 4 euroren truke erosi ahal izango dira FAS Zine Klub eta Azkuna Zentroko txartelak izanez gero edo El Correo edo Campos Eliseos Klubeko harpideduna bazara. Golem Alhondiga zinemetako 2. aretorako sarrera doakoa izango da plaza-kopurua bete arte.